Cabo Home

No extremo máis occidental da península do Morrazo, na parroquia do Hío, atópase o espazo natural de Cabo Home.

Sen dúbida algunha, neste espazo natural merece a pena visitar Donón, unha pequena aldea tradicional rodeada de terras de cultivo e montañas, a Costa da Vela, abruptos cantís onde
crecen os riquísimos percebes e desde onde se pode gozar dunhas vistas espectaculares das Illas Cíes.

O Cabo atópase iluminado por tres faros que marcan a entrada da ría de Vigo.

Faro de Punta Subrido: está situado a carón do camping da praia de Melide, e accédese a el a través dun pequeno sendeiro. Desde el pódese observar a un lado unha marabillosa vista das incribles illas Cíes, e ao outro as praias de Viñó, Nerga e Barra.

Faro de Punta Robaleira: Pódese chegar a el desde a praia de Melide ou desde un acceso ao camiño principal. A súa cor rechamante faino ser o máis fotoxénico e visitado de toda a ruta.

Faro de Cabo Home: Atópase preto do de Punta Robaleira e desde el podemos gozar das marabillosas vistas de Cabo Udra, o Monte Facho e a Costa da Vela. A illa de Ons atópase
detrás del.

Non moito máis lonxe atopamos a praia de Melide que, rodeada dun extenso piñeiral dunar, conta cunha area branca finísima, e o monte do Facho, onde se descubriu o santuario de
peregrinación máis antigo de Galicia, con máis de 100 aras romanas que, situadas no cumio, honraban a unha deidade galaica chamada Bero Breo.

As postas de sol desde este espazo natural son espectaculares, e crese que a elas foi debido a creación do santuario.